"Bir ailə yoxa çıxdı" | Zərdabda xeyir işdən qayıdan şəxslər yanaraq həlak oldular - Baku TV

Zərdab rayonunda ağır yol-nəqliyyat hadisəsi baş verib. Hadisə Zərdab-Ağcabədi avtomobil yolunda qeydə alınıb.

Belə ki, “Kia” markalı minik avtomobili traktorla toqquşandan sonra alışaraq yanıb. Hadisə nəticəsində avtomobildə olan 7 nəfərdən 5-i yanaraq dünyasını dəyişib.

Mərhumların qohumu Eyvaz Eyvazov baş verən hadisə haqqında jurnalistlərə açıqlama verib.

“Beş nəfəri artıq dəfn etmişik. Sözün bitdiyi yerdir, böyük bir faciə baş verib. Qalib müəllimin nəvəsinin məktəbə başlaması və ad günü münasibətilə məclis təşkil olunmuşdu. Yığıncaq bitəndən sonra başqa maşın olmadığı üçün hamı bir avtomobilə əyləşib qayıtmalı oldu. Yolun döngəsində maşın traktorla toqquşub və qapıları kilidlənib. Avtomobilin ön hissəsində başlayan yanğın sürətlə alovlanıb. Zərbənin gücündən və ya zəhərli tüstüdən içəridəki 7 nəfərdən 5-i həyatını itirib”, – deyə o bildirib.