Bölgələrdəki avtomobil qəzaları can aldı | Ölən və yaralananlar var

Sumqayıtda yol-nəqliyyat hadisəsi baş verib. "Toyota Camry" markalı minik avtomobili idarəetmədən çıxaraq Samur-Abşeron kanalının Sumqayıtdan keçən hissəsinə düşüb.

Hadisə nəticəsində xəsarətalanların olduğu bildirilir. Yaralılar dərhal Sumqayıt Təcili Tibbi Yardım Xəstəxanasına çatdırılıblar.

İsmayıllıda isə iki avtomobilin toqquşması nəticəsində 1 nəfər həyatını itirib. Hadisə rayonunun Buynuz kəndi ərazisində qeydə alınıb.

Belə ki, Vüsal Rubilzadənin idarə etdiyi "Kia" markalı avtomobillə Zeynəddin Əliyevin idarə etdiyi "VAZ-2106" markalı avtomobil toqquşub. Nəticədə "VAZ 2106”da olan sərnişin, 74 yaşlı Gülyaz Əliyeva hadisə yerində ciddi xəsarət alıb. Yaralı xəstəxanaya çatdırılsa da, onun həyatını xilas etmək mümkün olmayıb.

Kürdəmirdə baş verən qəzada isə mikroavtobus xırdabuynuzlu heyvan sürüsünə çırpılıb. Nəticədə 20-yə yaxın qoyun tələf olub.

Hadisə Bakı-Qazax əsas magistral yolunun rayonun Karrar kəndi ərazisindən keçən hissəsində qeydə alınıb. Təsərrüfat sahibi Şahlar Quliyevin sözlərinə görə, ona ümumilikdə 8 min manata yaxın maddi ziyan dəyib.

Hər üç faktla bağlı araşdırma aparılır.