Boşanmaq istəyən arvadını yolda öldürdü | Xəzər rayonunda dəhşətli hadisə - Baku TV

Paytaxtın Xəzər rayonunda qətl hadisəsi baş verib. Hadisə rayonun Binə qəsəbəsində qeydə alınıb.

Məlumata görə, 40 yaşlı Günel Abbasova işdən evə qayıdan zaman 37 yaşlı həyat yoldaşı Firuz Qasımov ona küçədə bıçaqla çoxsaylı xəsarətlər yetirib və hadisə yerindən qaçıb. Ağır xəsarət alan Günel Abbasova hadisə yerində həyatını itirib.

“Qonşulardan biri məni çağıraraq küçədə insident baş verdiyini bildirdi. Çölə çıxanda gördük ki, qadın yerdə çabalayır. Demək olar ki, artıq həyatını itirmişdi”, – hadisə şahidi bildirib.

Qonşuların sözlərinə görə, Firuz Qasımov anasının il mərasimindən sonra Biləsuvar rayonundan qayıdaraq Bakıya gəlib. İşdən evə qayıdan yoldaşı ilə küçədə rastlaşıb. Firuz Qasımov boşanmaq üçün məhkəməyə verdiyi ərizəyə görə yoldaşına irad tutub. Qadın boşanacağını deyib. Bundan hiddətlənən Firuz həyat yoldaşının sinəsinə 14 bıçaq zərbəsi vurub.

Qeyd edək ki, cütlüyün 14 və 15 yaşlarında iki oğlu var. Cinayəti törətməkdə şübhəli bilinən Firuz Qasımov Xəzər Rayon Polis İdarəsinin əməkdaşları tərəfindən saxlanılaraq istintaqa təhvil verilib.

Faktla bağlı rayon prokurorluğunda araşdırma aparılır.