Çöldə qalan ailə qurumun təklifi ilə niyə razılaşmadı? - Goranboyda güclü yanğın

Goranboyun Yenikənd kəndində ev yanıb.

Yanğın kənd sakini Əkbər Abdullayeva məxsus ikimərtəbəli, beşotaqlı mənzildə qeydə alınıb.

Hadisə yerinə çağırılan yanğınsöndürənlər alovu ram etsələr də, ev əşyaları ilə birgə yanaraq yararsız hala düşüb.

“Gecə saat 3 radələri idi, yoldaşım məni qaldırdı ki, evimiz yanır. Həmin an hiss etdim ki, həqiqətən də, boğuluruq. Qalxdıq, pəncərədən çölə tullandıq. Hər şeyimiz yandı, bir çöp də çıxara bilmədik. Mənə təxminən 35-40 min arasında ziyan dəyib”, – deyə zərərçəkən Əkbər Abdullayev bildirib.

Goranboy Rayon İcra Hakimiyyətindən verilən məlumata görə, zərərçəkən şəxslərə təklif edilib ki, kənd məktəbindən yer ayrılsın, şərait düzəldilsin, müvəqqəti orada yaşasınlar:

“Onlar etiraz ediblər ki, bizə keçmiş məcburi köçkünlərin yaşadıqları yerdən mənzil verilsin. İcra Hakimiyyətinin həmin evlərdə sakinlərin yerləşdirilməsi üçün səlahiyyəti yoxdur. Onlar mənzillərini sığorta da etdirməyiblər ki, belə vəziyyətdə dəyən ziyan qarşılansın”.

O da qeyd olunub ki, qurum tərəfindən kənd sakinlərinin müraciəti və zərərçəkən şəxslərin ərizəsi ilə bağlı Qaçqınların və Məcburi Köçkünlərin İşləri üzrə Dövlət Komitəsinə məktub ünvanlanıb.