Oğuzlular xəstəliyin qarşısını ala bilmir | Kənd sakinləri çıxılmaz vəziyyətdə qaldı

Oğuzun Yaqublu və Yenikənd kəndlərində ev quşları kütləvi tələf olub. Quşlar arasında tələfat noyabr ayının sonundan başlayıb və bir həftə ərzində adıçəkilən kəndlərin əksər ərazilərini bürüyüb.

Sakinlərin sözlərinə görə, axşam yemlədikləri ev quşları səhərə sağ çıxmayıb. Sakinlərin əksəriyyətinə 2 000-3 000 manat maddi ziyan dəyib.

Anidən xəstəliyə tutulan ev quşlarına bəzi dərmanlar verilsə də, tələfatın kütləviliyinin qarşısını almaq mümkün olmayıb.

“50-dən yuxarı toyuq və cücə, 50-60 hindtoyuğum tələf olub. Quşların pipikləri qaralır, ağızlarından su axır, 2-3 gün ərzində ölürlər. Səhər görürük ki, ağacda yatan toyuqların hamısı tələf olub”, – deyə zərərçəkən Məhəmməd İbrahimov söyləyib.

Qida Təhlükəsizliyi Agentliyinin (AQTA) şöbə müdiri Qalib Əbdüləliyev bildirib ki, məsələ ilə bağlı Kənd Təsərrüfatı Nazirliyi yanında Aqrar Xidmətlər Agentliyinin aidiyyəti qurumları və AQTA-nın regional bölmələri adekvat tədbirlər görürlər:

“Bu qənaətə gəlinib ki, quşlar arasında indiyə qədər hər hansı xüsusi təhlükəli yoluxucu xətəliyə rast gəlinməyib. Bir sıra hallarda mövsümi amillərin təsirindən asılı olaraq yemlənmə, saxlanma şəraitinin pisləşməsi, quşlarda müəyyən profilaktik tədbirlərin vaxtında aparılmaması bəzi tələfat halları ilə nəticələnə bilər”.