Deyirdi ki, ölsəm, canım qurtarardı... | Ağdaşda yaşlı qadının faciəvi ölümü

Ağdaşda intihar hadisəsi baş verib.

Hadisə rayonun Qoşaqovaq kəndində qeydə alınıb.

Belə ki, 76 yaşlı kənd sakini Nəbiyeva Vəzifə Hidan qızı yaşadığı evdə sirkə turşusu içərək özünə qəsd edib.

Yaxınları qadını dərhal Ağdaş Rayon Mərkəzi Xəstəxanasına çatdırsalar da, onun həyatını xilas etmək mümkün olmayıb.

Mərhumun oğlu anasının psixoloji vəziyyətinin yaxşı olmadığını bildirib:

“Anam iflic olmuşdu, 7 aydır müalicə edirdik. Birtəhər ayağa qalxıb yeriyirdi, özünü idarə edirdi. Sadəcə bəzən ağlı gedib-gəlirdi. Axır vaxtlar deyirdi ki, ölmək istəyirəm, ölsəydim, canım qurtarardı. Özünə qəsd etməyini gözləmirdik.

Hadisə baş verəndə 11-ci sinifdə oxuyan qızım yanında olub. Uşaq görüb ki, anam sirkəni nəlbəkiyə töküb içib. Xırıldadığını görəndə mənə zəng edib. Mən gələndə yaxşı idi. Təcili tibbi yardıma zəng etdim, gəlib apardılar, amma həyatını xilas etmək mümkün olmadı”.

Faktla bağlı Ağdaş Rayon Prokurorluğunda araşdırma aparılır.