Evlərdən oğurluq edənlər saxlanıldı

Ucar rayonu ərazisində evlərdən oğurluq edən dəstə üzvləri həbs edilib.

Rayon Polis Şöbəsinin əməkdaşları tərəfindən keçirilən tədbirlər nəticəsində oğurluq əməllərini törətməkdə şübhəli bilinən Ucar rayon sakinləri – əvvəllər də dəfələrlə məhkum olunmuş Ayaz Əhmədov, Ramil Alıyev və Elşad Hüseynov saxlanılaraq istintaqa təhvil verilib.

Araşdırma zamanı məlum olub ki, həmin şəxslər müxtəlif vaxtlarda üç fərdi yaşayış evinə qanunsuz daxil olaraq müxtəlif məişət əşyaları və cihazları oğurlayıblar. Daha sonra həmin əşyaların bir qismini sataraq, pulları öz aralarında bölüblər.

Qeyd edək ki, oğurluq əməlləri nəticəsində ev sahiblərinə 10 min manata yaxın ziyan vurulub. Faktla bağlı cinayət işi başlanılıb, saxlanılan şəxslərin digər bənzər cinayətlərdə də iştiraklarının olub-olmaması araşdırılır.