Gəlininə nifrət edən qayınana oğlunu necə yoldan çıxardı? - SONUNCU ŞAHİD

Oğul anasının bir sözünə görə ona xəyanət etdiyini düşündüyü həyat yoldaşını qətlə yetirib.

Belə ki, içki aludəçisi olan, həyat yoldaşı Vəfa (Adlar şərtidir) və anası Nübarla birlikdə atasından qalan mənzildə yaşayan Anar səhər kafedən çıxır və spirtli içki qəbul etdiyi üçün səndələyərək evə gəlir. Anası onu heç nə olamamış kimi mehribanlıqla qarşılayır. Həyat yoldaşı isə ondan “yenə içmisən?” deyə soruşur.

Nübar gəlininə “yaxşı edir, oğlumla işin olmasın” cavabını verir. Bu onların ailə həyatında hər gün təkrarlanan hal idi. Növbəti gün Anar anasından təqaüd kartını istəyir. Vəfa etiraz etsə də, Nübar əsəbiləşərək onu təhqir edir. Daha sonra Anar kartdan pulu çıxarır və içmək üçün kafeyə yollanır.

Bütün bunlar baş verərkən Vəfa sinif yoldaşı ilə yazışaraq əri tərəfindən ona yaşadılan stresi bu yolla unutmağa çalışır. Onu kənardan gizlicə izləyən Nübarın isə gəlini barəsində ağlına pis və məkrli fikirlər gəlir. Evə sərxoş və yarıyuxulu qayıdan Anar dəhlizdə oturan anasından “Vəfa poğundur, o səni aldadır” sözlərini eşidir. Anar gecəni əsəbi vəziyyətdə keçirir.

Növbəti gün o, yuxusuz olmasına baxmayaraq, həyat yoldaşını izləməyə qərar verir. Vəfa bəzənərək sinif yoldaşları ilə görüşə gedəcəyini deyib evdən çıxır. İçkinin təsirindən ayılan Anar qəzəbli halda onu gizlicə izləyir. Daha sonra isə Vəfanı gözdən itirir və evə gəlir. Vəfa sinif yoldaşları ilə görüşdən qayıtdıqdan sonra Anar onu yataq otağında bıçaq zərbələri ilə qətlə yetirir.