Gürcüstanda dəhşətə gətirən anlar | 7 azərbaycanlı gənc faciəvi şəkildə həlak oldu - Baku TV

Gürcüstanın əsasən azərbaycanlıların məskunlaşdığı Qardabani rayonunda avtoqəza nəticəsində 7 nəfər ölüb, bir nəfər isə ağır vəziyyətdə xəstəxanaya yerləşdirilib.

Hadisə Qardabani-Rustavi yolunda qeydə alınıb. Qəza nəticəsində Birlik kəndindən olan iki qardaş – Şamil, Kamil Əliyevlər və onların qohumlarının – Xəlil və Sahir Cəlilovların həyatlarını itirdikləri məlum olub.

Ölənlərin Saqarejo rayonundan olan digər gənclərlə birlikdə avtomobildə olduqları bildirilir. Məlumata görə, Şamil 17, Kamil isə 19 yaşında olub.

Yerli sakinlər onların valideynlərini erkən itirdiklərini və nənə-baba himayəsində böyüdüklərini bildirirlər.

Hadisə şahidlərinin ilkin məlumatına görə, zərbənin gücündən ağac kökündən çıxıb, avtomobil iki hissəyə bölünüb. Avtomobilin bir hissəsi alışaraq yanmağa başlayıb.

Hadisə yerinə hüquq-mühafizə orqanları cəlb olunub, istintaq tədbirləri davam etdirilir. Mərhumların meyitləri üzrə məhkəmə-tibbi ekspertiza təyin olunub. Yaralı gəncin vəziyyətinin kritik olduğu bildirilir.