Həbsdən çıxan Rəhim dayısını görün niyə öldürdü - Baku TV

Bakıda dayısını qətlə yetirməkdə təqsirləndirilən Rəhim Qasımovun cinayət işi üzrə məhkəmə araşdırması yekunlaşıb.

Bakı Ağır Cinayətlər Məhkəməsinin hakimi Kamil Əliyevin sədrliyi ilə keçirilən prosesdə prokuror dövlət ittihamının müdafiəsi zamanı təqsirləndirilənin 19 il azadlıqdan məhrum edilməsini məhkəməyə təklif edib.

Müşavirədən sonra hökm elan edilərək Rəhim Qasımov 17 il müddətinə azadlıqdan məhrum edilib.

Qeyd edək ki, hadisə 2025-ci ilin avqustunda paytaxtın Xətai rayonu ərazisində yerləşən mənzillərdən birində baş verib. 60 yaşlı Firdovsi Həsənovun üzərində xəsarət izləri olan meyitinin yaşadığı mənzildə aşkar edilməsi barədə rayon prokurorluğuna məlumat daxil olub. İlkin araşdırmalarla 32 yaşlı Rəhim Qasımovun dayısının yaşadığı evə gələrək ona bıçaqla xəsarət yetirməklə Firdovsi Həsənovu qəsdən öldürməsinə əsaslı şübhələr müəyyən edilib.

Təqsirləndirilən Rəhim Qasımov ifadəsi zamanı dayısını qətlə yetirməsini onun tərəfindən təhqir olunması ilə əsaslandırıb. O, həbsdən çıxdıqdan sonra dayısı ilə aralarında olan soyuq münasibətləri qaydasına qoymaq məqsədilə onun yaşadığı evə gəlib və dayısını yatmış vəziyyətdə görüb. Dayısını yuxudan oyadaraq gəldiyini bildirib və ondan halını soruşub. Bu zaman dayısının ona ağır cavab verməsi Rəhimi özündən çıxardıb və o, masanın üzərindəki bıçaqla ona zərbələr endirərək hadisə yerindən uzaqlaşıb.

Rəhim Qasımova qarşı Cinayət Məcəlləsinin Cinayət Məcəlləsinin 120.1-ci (qəsdən adam öldürmə), 157.1-ci (mənzildə yaşayanın iradəsi ziddinə mənzilə daxil olma), 234.4.1 və 234.4.3-cü (qanunsuz olaraq narkotik vasitələri, psixotrop maddələri əldə etmə, saxlama, daşıma, göndərmə və ya satma) maddələri ilə ittiham irəli sürülüb.