Həyat yoldaşını uşaqlarının gözü önündə öldürən ataya hansı cəza verildi? - Baku TV

Bakıda həyat yoldaşını uşaqlarının gözü qarşısında boğaraq öldürməkdə təqsirləndirilən Ziyəddin Quliyevin cinayət işinin məhkəmə istintaqı yekunlaşıb.

Bakı Ağır Cinayətlər məhkəməsinin hakimi Kamil Əliyevin sədrliyi ilə keçirilən prosesdə prokuror ittiham nitqi ilə çıxış edərək təqsirləndirilənin 18 il 6 ay müddətinə azadlıqdan məhrum edilməsini məhkəməyə təklif edib. Zərərçəkənin atası isə məhkəmədən Ziyəddin Quliyevə ən ağır cəza verilməsini istəyib.

Müşavirədən sonra hökm elan edilərək Ziyəddin Quliyev 17 il azadlıqdan məhrum edilib.

Qeyd edək ki, hadisə 2025-ci ilin aprelin 20-də paytaxtın Xətai rayonu, Əhmədli qəsəbəsində baş verib.

Ziyəddin Quliyev 9 il rəsmi nikahda olduğu arvadı Aysel Qurbanovanı 9 və 5 yaşlı övladları ilə kobud rəftar etməsindən, onları dəfələrlə döyməsindən hiddətlənərək yatmış vəziyyətdə olduğu zaman boğaraq öldürmək qərarına gəlib.

O, 20 aprel 2025-ci il tarixdə səhər saatlarında arvadının yuxuda olmasından istifadə edərək naqili onun boğazına keçirərək boğmağa başlayıb. Bu zaman yaranan səs-küyə oyanan uşaqlar atasından nə etdiyini soruşanda o isə cavabında analarının xəstə olduğunu və ona yardım etdiyini deyərək əməlinə davam edib.

Bununla da Ziyəddin Quliyevə qarşı Cinayət Məcəlləsinin 120.4 (xüsusi amansızlıqla qəsdən adam öldürmə) və 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə) maddələri ilə ittiham irəli sürülüb.