Hipermarketə silahlı hücum edənlərə hökm oxundu | Məhkəmədən görüntülər

“Bravo” hipermarketinə silahlı basqınla bağlı təqsirləndirilənlərin cinayət işi üzrə məhkəmə prosesi başa çatıb.

Bakı Ağır Cinayətlər Məhkəməsində hakim Azad Məcidovun sədrliyi ilə keçirilən son prosesdə hökm elan edilib. Barələrində həbs olmayan qətimkan tədbiri seçilən Rövşən İsmayılov və qazi Babək İskəndərov məhkəmə zalında həbs olunublar.

Hökmdən əvvəl son söz zamanı təqsirləndirilən Dəyanət Qüdrətov hakimdən yüngül cəza, digərləri isə bəraət istəyiblər.

İttihama görə, 2023-cü ilin martın 4-də qabaqcadan əlbir olan bir qrup şəxs tərəfindən paytaxtın Xətai rayonu ərazisində yerləşən hipermarketə edilən silahlı basqın nəticəsində orada quraşdırılmış “Unibank Kommersiya Bankı” ASC-yə məxsus bankomata pul vəsaitlərini yerləşdirən Samir Şaydayevə ağır xəsarət yetirilməsi, onun mühafizəsini təşkil edən Rüfət Həşimovun isə öldürülməsi, eləcə də külli miqdarda pul vəsaitinin ələ keçirilməsi faktı ilə bağlı cinayət işi başlanılıb.

Hadisəyə görə, Ruhlan İsmayılov, Dəyanət Qüdrətov, Azər Məmmədov, Səbuhi Qurbanov, İbrahim İbrahimov, Babək İsgəndərov və Rövşən İsmayılov cinayət məsuliyyətinə cəlb edilib.

Qeyd edək ki, əməliyyat zamanı Ruhlan İsmayılov avtomat silahla polis əməkdaşlarına müqavimət göstərib. Görülmüş tədbirlər nəticəsində o məhv edilib.