İnterpolun “qırmızı bülleten”lə axtarışa verdiyi şəxs kimdir?

Fransanın milyardlarla dövriyyəsi olan “SAUR” şirkətinin vitse-prezidenti Anass Derraz barəsində Dövlət Təhlükəsizliyi Xidmətində başlanılmış cinayət işi üzrə məhkəmənin ilk hazırlıq iclası keçirilib.

Bakı Ağır Cinayətlər Məhkəməsində hakim Fərid Namazovun sədrliyi ilə keçirilən prosesdə təqsirləndirilən şəxs həm fransız, həm də ingilis dili tərcüməçiləri ilə təmin edilib.

A.Derraz işin yenidən ibtidai istintaqa qaytarılmasını məhkəmədən xahiş edib. Müşavirədən sonra hakimlər kollegiyası cinayət işinin məhkəmə araşdırmasına verilməsi barədə qərarını elan edib.

Bununla yanaşı, A.Derraz barəsində seçilmiş başqa yerə getməmək haqqında qətimkan tədbiri qüvvədə saxlanılıb. Məhkəmənin baxış iclası iyulun 3-nə təyin edilib.

Qeyd edək ki, Dövlət Təhlükəsizliyi Xidməti tərəfindən Anass Derraza Cinayət Məcəlləsinin 193-1.3.2 (cinayət yolu ilə əldə edilmiş əmlakı leqallaşdırma, xeyli miqdarda törədildikdə) və 32.5, 311.3.3 (rüşvət alma (passiv rüşvətxorluq), külli miqdarda törədildikdə) maddələri ilə ittiham irəli sürülüb.