“Kahı” planı yenə əllərində partladı | Gömrükdə nələr ortaya çıxdı?

“Kahı” yükü aparan nəqliyyat vasitəsindən külli miqdarda narkotik vasitə aşkar edilib.

Bu barədə Baku TV-yə Dövlət Gömrük Komitəsindən məlumat verilib.

Bildirilib ki, Astara Gömrük İdarəsi əməkdaşlarının həyata keçirdikləri kompleks əməliyyat-axtarış və gömrük nəzarəti tədbirləri nəticəsində növbəti dəfə külli miqdarda narkotik vasitə ‒ marixuana aşkar edilərək qanunsuz dövriyyədən çıxarılıb.

“Astara” gömrük postunda Azərbaycan ərazisindən tranzit keçməklə İrandan Rusiyaya “kahı” yükü aparan növbəti nəqliyyat vasitəsi gömrük yoxlamasına cəlb edilib.

Kinoloji xidmət itinin köməkliyi ilə aparılan yoxlama zamanı dörd ədəd paletdəki yeşiklərdən üzəriləri kahı yükü ilə örtülərək gömrük nəzarətindən gizlədilən 76 ədəd bağlamada qablaşdırılmaları ilə birlikdə ümumi çəkisi təqribən 70 kiloqram 410 qram narkotik vasitə ‒ marixuana tapılıb.

Faktla bağlı araşdırma aparılır.