Maşının içində sıxılı qalan qadının xilas anı | Lənkəranda ağır qəza

Lənkəranın Viravul kəndi ərazisində yol qəzası baş verib.

Rayon sakini 28 yaşlı Gülyanaq Hüseynli idarə etdiyi KIA markalı minik avtomobili ilə hərəkətdə olarkən idarəetməni itirərək yol kənarındakı ağaca çırpılıb.

Avtomobildə sıxılmış vəziyyətdə qalan sürücünü hadisə yerinə gələn Fövqəladə Hallar Nazirliyinin Cənub Regional Mərkəzinin xilasediciləri çıxarıb və aidiyyəti üzrə təhvil veriblər.

Lənkəran Rayon Mərkəzi Xəstəxanasından bildirilib ki, iyulun 26-da saat 09:45 radələrində baş vermiş yol-nəqliyyat hadisəsi ilə bağlı 1 nəfər (qadın cinsli) şəxs sağ bud sümüyünün sınığı, sağ ayağın 2-ci barmağının travmatik amputasiyası diaqnozu ilə təcili yardım şöbəsinə hospitalizasiya olunub. Yaralıya zəruri ilkin tibbi xidmətlər göstərilib. Müalicəsi cərrahiyyə şöbəsində davam etdirilir.

Məlumata görə, yağışlı havada avtomobilin qarşısına it çıxıb. Sürücü heyvanı vurmamaq üçün manevr edib və qəza baş verib.

Faktla bağlı araşdırma aparılır.