“OBA” marketdə qan tökən oğlan məhkəmədə nə xahiş etdi? | Qətlin detalları

Bakının Sabunçu rayonunda qətl hadisəsi törətməkdə ittiham olunan yetkinlik yaşına çatmayan Elcan Süleymanovun cinayət işi üzrə məhkəmə baxış iclası keçirilib.

Bakı Ağır Cinayətlər Məhkəməsində hakim Leyla Məmmədova-Əsgərovanın sədrliyi ilə təşkil olunan prosesdə təqsirləndirilən Elcan Süleymanov sərbəst ifadə verib.

O, ifadəsində törətdiyi əməldən peşman olduğunu bildirərək hadisə zamanı içkili olduğunu və zərərçəkən şəxsin yaxınlarından onu bağışlamalarını xahiş edib.

Sonra zərərçəkən şəxsin hüquqi varisi təqsirləndirilən şəxsi bağışlamadığını və ondan şikayətçi olduğunu bildirib. Hər iki tərəfin ifadəsi dinlənildikdən sonra növbəti məhkəmə baxış iclasının vaxtı dəqiqləşdirilib. İş üzrə növbəti məhkəmə iclası aprelin 21-nə təyin olunub.

Qeyd edək ki, hadisə ötən il oktyabrın 2-də paytaxtın Sabunçu rayonunun Ramana qəsəbəsi ərazisində fəaliyyət göstərən “Oba” marketdə qeydə alınıb.

Belə ki, 2008-ci il təvəllüdlü Elcan Süleymanov orada satıcı işləyən 2004-cü il təvəllüdlü Xəyal Nağıyevə aralarında yaranan mübahisə zamanı bıçaqla xəsarət yetirib. Sonuncu aldığı xəsarətdən xəstəxanada dünyasını dəyişib.

Saxlanılan Elcan Süleymanova qarşı Cinayət Məcəlləsinin 120.2.2-ci (qəsdən adam öldürmə, xuliqanlıq niyyəti ilə törədildikdə) maddəsi ilə ittiham irəli sürülüb.