Onu görmədim, sonradan məlum oldu ki... | Azərbaycan diaspor rəhbərinin oğlu hakim qarşısında

Yekaterinburq şəhərində Azərbaycan diasporunun rəhbəri Şahin Şıxlinskinin oğlu və onun müavini, vəkil Mutvalı Şıxlinskinin məhkəmə iclası qapalı keçirilib.

Bu barədə TASS məlumat yayıb.

Bildirilir ki, Leninski Rayon Məhkəməsinin hakimi müstəntiqin vəsatətini təmin edərək qərar verib. Bundan sonra KİV nümayəndələri məhkəmə salonundan çıxarılıblar.

Mutvalı Şıxlinski məhkəmə iclası başlamazdan əvvəl bildirib ki, hakimiyyət nümayəndəsinə qəsdən xətər yetirməyib və baş vermiş hadisədən təəssüflənir:

"Bilərəkdən etməmişəm. Onu görmürdüm, sağımda olduğu sonradan məlum oldu. Baş verənlərə görə dərindən təəssüflənirəm".

Qeyd edək ki, Azərbaycan diasporunun rəhbəri Şahin Şıxlinskinin oğlu və onun müavini, vəkil Mutvalı Şıxlinski barəsində həbs qətimkan tədbiri seçilib. Leninski Rayon Məhkəməsi onu hakimiyyət nümayəndəsinə qarşı zorakılıq işi üzrə təqsirli bilib. Mutvalı Şıxlinski iki ay müddətinə həbs edilib.