Qorxulu anlar yaşandı, atəş açıldı | Xəzər dənizində nə baş verir?

Dövlət Sərhəd Xidmətinin (DSX) Sahil Mühafizəsi Xəzər dənizinin Azərbaycan sularında irimiqyaslı narkotik əməliyyatı keçirib. Sahil nəzarəti bölmələri tərəfindən naməlum üzmə vasitəsi aşkar edildikdən sonra onun saxlanılması üçün təqibetmə əməliyyatına start verilib. Gəminin dayandırılması məqsədilə “Dövlət sərhədi haqqında” Qanuna uyğun olaraq xəbərdarlıq atəşi açılıb və “Layner” tipli üzmə vasitəsi Xaçmaz rayonu ərazisində sahilə yan almağa məcbur edilib. İlkin dindirmə zamanı gəmidə olan üç nəfər — Atacani Tahir Xaləd, Məxtumi Sadiq Ərazqurban və Qangerme Omid Çalce adlı İran İslam Respublikası vətəndaşları olduğu müəyyənləşib. Saxlanılan şəxslərin GPS qurğusunun yaddaşına baxış göstərib ki, onlar İrandan 1074 km məsafə qət edərək Türkmənistan ərazi sularından keçməklə Azərbaycana daxil olublar. Əməliyyat nəticəsində ümumi çəkisi 509 kiloqram 800 qram olan külli miqdarda narkotik vasitə aşkar edilərək götürülüb. Hadisə yerində "Niva" markalı avtomobildə olan 4 nəfər Azərbaycan vətəndaşı da şübhəli şəxs qismində saxlanılıb. Baş Prokurorluqla birgə istintaq tədbirləri davam etdirilir.