"Altlarında idim, nə qədər əlləşdimsə..." - Burada yaşayan hamı qorxu içindədir - Baku TV

Ucar rayonunda sahibsiz itlərin hücumu nəticəsində 61 yaşlı sakin xəsarət alıb.

Hadisə rayonun 28 May küçəsində qeydə alınıb.

Zərərçəkən Rəhman Əsgərov baş verənlərlə bağlı Baku TV-yə açıqlama verib.

Rəhman Əsgərovun sözlərinə görə, yolda hərəkət edərkən dörd sahibsiz it qəfil arxadan ona hücum edib:

“Onlar qollarımdan yapışdılar. Qışqırdım, itlərin altında qaldım. Nə qədər çalışsam da, onlardan qurtula bilmədim. Sonra qonşu gəldi, onu görən kimi qaçdılar. Əlimdən qan axırdı. Məni xəstəxanaya apardılar. Ağrıdan səhərə kimi yata bilməmişəm. Demək olar ki, burada hər gün itlərin hücumuna məruz qalırıq”.

Ucar Şəhər Bələdiyyəsindən bildirilib ki, məsələ ilə bağlı müvafiq tədbirlərin görülməsinə başlanılıb.

Qurumdan verilən məlumata görə, hadisənin baş verdiyi ərazidə sahibsiz itlər kənarlaşdırılır və yaxın gələcəkdə onlar üçün saxlanc yerlərinin tikilməsi planlaşdırılır.

TƏBİB-dən isə qeyd olunub ki, dekabrın 23-ü saat 10:30 radələrində it dişləməsi səbəbi ilə bir nəfər Ucar Rayon Mərkəzi Xəstəxanasının Təcili tibbi yardım şöbəsinə hospitalizasiya olunub:

“1964-cü il təvəllüdlü pasiyentə bədənin müxtəlif nahiyələrinin didilmiş və cırılmış açıq yaraları diaqnozu qoyulub. Ona zəruri tibbi xidmətlər göstərilib, həmçinin quduzluğa qarşı peyvənd olunub. Vəziyyəti qənaətbəxş qiymətləndirilən şəxs ambulator müalicə üçün evə buraxılıb”.