"Dedilər ki, hansısa sahibkarın mühafizəçisidir" | Bakıda sürücü piyadanı vurub qaçdı

İyunun 11-i axşam saatlarında Hövsan-Türkan yolunda 51 yaşlı kişinin meyiti aşkarlanıb.

İlkin məlumata görə, o, avtomobil tərəfindən vurulub və nəqliyyat vasitəsinin sürücüsü hadisə yerindən qaçıb.

Hadisə şahidinin bildirdiyinə görə, vəfat edən şəxs “Türkan Aqropark” ərazisində mühafizəçi işləyirdi:

“Ağ rəngdə “VAZ-2107” gəlib üstündən keçib. Polis hadisə yerinə çatanda sürücü artıq orada yox idi. Deyilənə görə, həmin şəxs Türkan sakini deyil, bir sahibkarın evində mühafizəçi kimi qalırdı”.

Daxili İşlər Nazirliyindən bildirilib ki, iyunun 11-i axşam saatlarında paytaxtın Xəzər rayonu, Türkan qəsəbəsi ərazisində naməlum sürücü idarə etdiyi avtomobillə yol kənarında hərəkətdə olan piyada, 1974-cü il təvəllüdlü Famil İsmayılovu vurub:

“Sürücü daha sonra hadisə yerindən yayınıb. Piyada isə aldığı xəsarətlərdən dünyasını dəyişib. Xəzər Rayon Polis İdarəsinin əməkdaşları tərəfindən həyata keçirilən əməliyyat-axtarış tədbiri nəticəsində piyadanı vuran “VAZ-2107” markalı avtomobilin sürücüsü, 1980-ci il təvəllüdlü Vüqar Nadirov saxlanılaraq istintaqa təqdim edilib”.