"Dost idilər, birgə dəfn edirik..." | Faciəvi qəzada ölən gənclərin yaxınları fəryad etdi - Baku TV

Dekabrın 7-də Biləsuvar rayonunun Zəhmətabad kəndində ağır yol-nəqliyyat hadisəsi baş verib.

Hadisə nəticəsində bir ailənin üzvləri də daxil olmaqla ümumilikdə beş nəfər həyatını itirib.

Rayon sakini, 22 yaşlı Vasif Həsənlinin idarə etdiyi “Lexus” markalı avtomobilin idarəetməni itirdiyi və su kanalına düşdüyü bildirilir.

Qəza nəticəsində sürücü ilə yanaşı, sərnişinlər – 24 yaşlı Rusif Həsənli, 35 yaşlı İldırım Həsənli, 25 yaşlı Məhəmməd Məmmədli və 18 yaşlı Əliqardaş Rəsulzadə hadisə yerində dünyasını dəyişiblər.

Hadisə kənddə böyük sarsıntı yaradıb. Mərhum İldırım Həsənlinin atası İlqar Həsənov yaşadıqları faciəni belə təsvir edib:

“Ölənlərdən ikisi qardaşım balalarıdır. Digəri də qonşumdur. Ağır dərddir. Ailə məhv oldu, bircə nəvəsi qalıb. İldırım mənim oğlum idi, 35 yaşı var idi. Deyirlər, maşını 150 km/saat sürətlə idarə ediblər. İdarəetməni itirib və nəticə bu olub”.

Həlak olanlardan biri – 25 yaşlı Məhəmməd Məmmədlinin atası Vidadi Məmmədov isə bu sözləri deyib:

“Hamısı mənim balalarımdır. Bizim ailə üçün böyük faciədir. Qonşunun iki oğlu və mənim oğlum – üçü də dost idilər. Üçü də bir yerdə dəfn olundular”.