"Kəpəz" Hospitalda dəhşət | Eyni cərrahın əməliyyat etdiyi daha 2 qadın da... - Baku TV

Bakının Nəsimi rayonunda yerləşən “Kəpəz Hospital”da ölüm hadisəsi baş verib.

Almaniya vətəndaşı, Türkiyə əsilli Tulin Turp tibb müəssisəsində keçirdiyi plastik əməliyyatdan sonra həyatını itirib. Məlumata görə, əməliyyatı estetik cərrah Seymur Məmmədov həyata keçirib.

Sözügedən həkimin adı daha əvvəl də plastik əməliyyatdan sonra baş verən ölüm hadisələri ilə bağlı gündəmə gəlib.

Baku TV-nin ötən il yayımladığı materialda 1989-cu il təvəllüdlü Nilufər Abdullayevanın ölümü barədə məlumat verilmişdi. Ailəsinin bildirdiyinə görə, N.Abdullayeva 15 avqust 2025-ci ildə “Etalon Hospital”da Seymur Məmmədov tərəfindən bədənşəkilləndirmə əməliyyatı keçirib və həmin gecə xəstəxananın palatasında vəfat edib.

Bundan başqa, Pərvanə Mirzəyevanın da Seymur Məmmədov tərəfindən “Etalon” klinikasında keçirilən əməliyyatdan sonra öldüyü barədə iddialar mediada yayılmışdı.

Beləliklə, son hadisə də nəzərə alınmaqla, Seymur Məmmədovun əməliyyat etdiyi iddia olunan üç qadının ölümü ilə bağlı məlumat ictimaiyyətə məlumdur: Nilufər Abdullayeva, Pərvanə Mirzəyeva və Tulin Turp.

Nilufər Abdullayevanın ailəsi bildirir ki, hadisə baş verdikdən sonra Seymur Məmmədov fəaliyyətini dayandırmayıb və “Kəpəz Hospital”da çalışıb.