"Qoxu gəldi, çıxıb gördük ki..." | Bakıda tullantılar olan ərazi qəsdən yandırıldı?

Paytaxtın Xətai rayonu, Əliağa Şıxlinski küçəsində məişət tullantıları yığılan sahədə güclü yanğın baş verib.

Nəticədə, yan tərəfdəki evə də ziyan dəyib. Sakinlər yanğının qəsdən törədildiyini iddia edirlər.

“Həyətə girəndə qoxu gəldi, çıxıb gördük ki, yanğın baş verib. Həmin ərazidə çarpayı var idi. Mənə elə gəlir ki, metal yığanlar onu aparmaq üçün qəsdən oranı yandırıblar”, – zərərçəkən Maarif Əhmədov söyləyib.

Fövqəladə Hallar Nazirliyindən (FHN) bildirilib ki, sözügedən ərazidə baş verən yanğınla əlaqədar dərhal əraziyə Dövlət Yanğından Mühafizə Xidmətinin qüvvələri cəlb olunub:

“Yanğınsöndürənlər tərəfindən həyata keçirilmiş zəruri və təxirəsalınmaz tədbirlər sayəsində təkər və məişət tullantıları yığılmış ərazidə baş vermiş yanğın hava şəraitinin küləkli və yayılma riskinin yüksək olmasına baxmayaraq, genişlənməsinə, o cümlədən yaxınlıqda yerləşən tikililərə keçməsinə imkan verilmədən qısa müddətdə söndürülüb.

Yanğın nəticəsində 300 kvadratmetr sahədə təkər və məişət tullantıları yanıb. Yaxınlıqda yerləşən avtomobil təmiri sexi və fərdi yaşayış evi yanğından mühafizə olunub”.