Şagirdə hücum edən it çobanın olub? - Qobudakı hadisənin detalları

Qobu qəsəbəsində sahibsiz itlərin hücum etdiyi azyaşlının qohumları və qonşular Baku TV-yə hadisənin təfərrüatını danışıblar.

Uşağın anası Fatma Şahbazovanın sözlərinə görə, hadisə məktəblinin dostları ilə həyətdə oynadığı vaxt baş verib: “Yalvardı ki, icazə ver, gedib həyətdə 5 dəqiqə oynayım. Razılıq verdim, pəncərədən də nəzarət etdim ki, gözdən itməsin. Sonra uşaqlara qoşulub gedib. Üç it hücum edib bədənini, başını parçalayıb”.

Qonşular sözügedən ərazidə sahibsiz itlərin sayının çox olduğunu deyirlər.

Çəkiliş zamanı qonşulardan biri uşağı çobanın itinin dişlədiyini iddia edib. Lakin çoban bununla razılaşmayıb və söyləyib ki, azyaşlıya küçə itləri hücum edib.

“Qobu Park 3”ün nəzarətçisi Məhəddin Mirzəliyev isə sahibsiz itlərin yaratdığı təhlükə ilə bağlı aidiyyəti qurumlara dəfələrlə müraciət edildiyini bildirib: “Burada küçə itlərinin sayı çoxdur. Bir neçə dəfə belə hal baş verib. Valideynlərə də, uşaqlara da təhlükə ilə bağlı xəbərdarlıq edirik”.