Salyanda fermada qətlə yetirilən kişi barədə tükürpərdən detallar

Salyan rayonunun Yeni Uluxanlı kəndində ərini qətlə yetirməkdə şübhəli bilinən 39 yaşlı Mətanət Hüseynova sərbəst buraxılıb.

Cinayətin zərərçəkmişin yetkinlik yaşına çatmayan oğlu tərəfindən törədilməsinə əsaslı şübhələr müəyyən edilib.

Bu barədə Baş Prokurorluqdan məlumat verilib.

Bildirilib ki, ötən il dekabrın 18-də itkin düşən Salyan rayon sakini, 40 yaşlı Röyal Hüseynovun qəsdən öldürülməsi müəyyən olunub.

Röyal Hüseynovun meyiti tapılaraq prokuror-kriminalistin və ekspertin iştirakı ilə həmin yerdən çıxarılıb, iş üzrə zəruri ekspertizalar təyin edilib. İstintaqın ilkin mərhələsində Röyal Hüseynovun arvadı, 38 yaşlı Mətanət Hüseynova cinayəti törətməkdə şübhəli şəxs qismində saxlanılıb.

Lakin növbəti gün davam etdirilən intensiv istintaq və əməliyyat-axtarış tədbirləri nəticəsində əldə olunan sübutlarla cinayətin zərərçəkmişin yetkinlik yaşına çatmayan oğlu tərəfindən törədilməsinə əsaslı şübhələr müəyyən edilib.

Mətanət Hüseynova sərbəst buraxılıb, cinayəti törətməkdə şübhəli bilinən yetkinlik yaşına çatmayan oğlu təqsirləndirilən şəxs qismində məsuliyyətə cəlb olunub. Onun barəsində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında həbs qətimkan tədbiri seçilib.

Cinayət işi üzrə istintaq davam etdirilir.