Şəkidə amansız qətlin təfərrüatları bilindi

Şəkidə oğul atasını qətlə yetirib.

Hadisə rayonun İnçə kəndində baş verib. Kənd sakini, 64 yaşlı İsmayıl Gülüyevin meyiti yaşadığı ünvanda aşkar edilib.

Keçirilmiş əməliyyat-axtarış tədbirləri nəticəsində hadisədə şübhəli bilinən mərhumun oğlu, 25 yaşlı Katıf Gülməmmədli tutularaq istintaqa təhvil verilib.

Kənd sakinlərinin sözlərinə görə, qətlə yetirilən İsmayıl Gülüyevin həyat yoldaşı uzun illər öncə dünyasını dəyişdiyindən o, evdə tək yaşayıb. İsmayıl Gülüyev bir neçə gün öncə qətlə yetiriləsə də, qonşular hadisədən yeni xəbər tutublar.

Daxili İşlər Nazirliyinin Mətbuat Xidmətinin Şəki regional qrupundan bildirilib ki, araşdırma zamanı Katıf Gülməmmədlinin İsmayıl Gülüyevi şəxsi münaqişə zəminində boğaraq qətlə yetirməsi və atasının həyatına son qoyduqdan sonra onun mobil telefonunu Bakı şəhərinə apararaq orada satması müəyyən edilib.

Qeyd edək ki, İsmayıl Gülüyev artıq dəfn edilib. Hadisə ilə bağlı araşdırma davam edir.