Şəmkirdə iki avtomobil toqquşdu | Faciəvi qəzanın təfərrüatı

Şəmkirdə beş nəfərin ölümü ilə nəticələnən ağır yol-nəqliyyat hadisəsi baş verib. Hadisə Şəmkir-Qazax magistral yolunun rayonun Dəllər Cəyir kəndi ərazisindən keçən hissəsində qeydə alınıb.

Qəzada ölənlər “VAZ-2106”nın sürücüsü 26 yaşlı Xətai Əliyev və onun maşınında olan sərnişin – 28 yaşlı Röyal Allahverdiyev, eləcə də “Niva” markalı avtomobilin sürücüsü 41 yaşlı Zaur Cabbarov və onun maşınındakı sərnişinlər – 53 yaşlı Elşən Xudaverdiyev və 28 yaşlı Babək Hüseynovdur.

Hadisə zamanı yaralanan “VAZ-2106”nın sərnişini 29 yaşlı Elçin Orucov isə Şəmkir Rayon Mərkəzi Xəstəxanasına çatdırılıb.

“Yol qəzası nəticəsində xəsarət alan bir nəfər şəxs Şəmkir Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. 1996-cı il təvəllüdlü bu şəxsdə alın, burun və hər iki ətrafın üst səthinin sıyrılmış yaraları var idi. Yaralara sarğı qoyulub, vəziyyəti qənaətbəxş olduğu üçün ambulator müalicəyə göndərilib”, – deyə adıçəkilən xəstəxananın həkimi Arzu Məmmədova bildirib.