Şərurlu İsfəndiyar məhkəmədən boyun qaçırdı | MTK-nın sahibinin həbsi istənildi

Böhtan və təhqir maddələri ilə xüsusi ittiham qaydasında məhkəməyə verilən "Şərur MTK"nın sahibi İsfəndiyar Axundovun məhkəmə prosesi keçirilib.

Binəqədi Rayon Məhkəməsinin hakimi Vüsal Tağıyevin sədrliyi ilə baş tutan ilk hazırlıq iclasında iştirak edən tanınmış iş adamının anket məlumatları dəqiqləşdirilib.

Qeyd edək ki, İsfəndiyar Axundov həbsdə olan iş adamı Emil Səməndərovu dələduz adlandırdığı üçün xüsusi ittiham qaydasında şikayət edilərək məhkəməyə verilib.

Prosesdə şikayətçinin vəkili Asim Abbasov İsfəndiyar Axundovun məhkəmə proseslərinə gəlməkdən boyun qaçırtdığını əsas gətirərək onun barəsində həbs qətimkan tədbirinin seçilməsi ilə bağlı vəsatət qaldırıb.

İsfəndiyar Axundovun vəkili Şahbaz Kərimov isə bunu əsassız hesab edib. Məhkəmə vəsatəti təmin etməyib. Növbəti vəsatət isə İsfəndiyar Axundovun ölkədən çıxışına qadağa qoyulması ilə bağlı olub.

İsfəndiyar Axundov isə öz növbəsində vəsatətə münasibət bildirərək Emil Səməndərovun vətəndaşlara vurduğu ziyanı ödəməyə hazır olduğunu deyib.

Onun barəsində məhkəmə tərəfindən təmin edilən vəsatət isə Daxili İşlər Nazirliyinin Baş Əməliyyat və Statistik İnformasiya İdarəsinə əvvəllər hər hansı cinayət törədib-törətməməsi barədə müvafiq sorğunun göndərilməsi barədə olub.

Xatırladaq ki, İsfəndiyar Axundov barəsində Cinayət Məcəlləsinin müvafiq maddələri üzrə xüsusi ittiham qaydasında şikayət edilib.