Su dolan gəmidən sərnişinlər təxliyə edilib

Yanvarın 26-da saat 21:00 radələrində sahildən 30 km aralı Xəzər dənizinin Bulla rayonu ərazisində “PS 173” sərnişin gəmisində heyət gəminin burun hissəsinə su dolduğunu görüb.

Bu barədə Azərbaycan Xəzər Dəniz Gəmiçiliyi QSC-dən bildirilib.

Qeyd olunub ki, dərhal təhlükəsizlik tədbirlərinin görülməsi üçün qurumun dispetçer xidmətinə məlumat verilib. Yaxınlıqda olan “Qobustan” və “Qız Qalası” sərnişin gəmiləri hadisə yerinə gəlib. Heyət üzvləri və sərnişinlər bu gəmilərə təxliyə ediliblər.

Hazırda 7 nəfər gəmi heyəti və 25 sərnişinin həyatı üçün hər hansı bir təhlükə yoxdur. “PS 173” gəmisi isə hadisə ərazisinə gələn “Caspian Spirit” gəmisi vasitəsilə yedəyə alınaraq sahilə doğru istiqamət götürüb.

Qeyd olunur ki, gəmidə baş verən hadisənin səbəbləri dəqiqləşdikdən sonra daha ətraflı məlumat veriləcək.