Sumqayıtda dəhşət yaşayan 6 uşağın atasından ürəkdağlayan sözlər - Baku TV

Sumqayıtda dəm qazından zəhərlənən altı uşaqdan biri ölüb.

Belə ki, çoxuşaqlı ailənin altı üzvü aprelin 1-də dəm qazından zəhərlənib. Azyaşlılar xəstəxanaya yerləşdirilib, daha sonra isə evə buraxılıblar. Qəfil halı pisləşən ikiyaşlı Gülcənnət Cəbrayılova yenidən xəstəxanaya yerləşdirilib. Aparılan müalicə və müayinələrə baxmayaraq, onun həyatını xilas etmək mümkün olmayıb.

Uşaqların atası Kamil Cəbrayılov hadisə ilə bağlı jurnalistlərə açıqlama verib.

“Müalicələrini davam etdirmək üçün uşaqları xəstəxanadan evə apardım. Dünən gördüm ki, hamısı yerə yıxılıb. Təcili yardım çağırdıq və uşaqları xəstəxanaya çatdırdıq. Dördünün vəziyyəti normal, ikisi isə ağır idi. Təəssüflər olsun ki, səhər saat 5-də zəng edib Gülcənnətin dünyasını dəyişdiyini bildirdilər. Qızımı təzə dəfn etmişəm”, – deyə o bildirib.

Sumqayıt Tibb Mərkəzindən qeyd olunub ki, 3 aprel 2026-cı il tarixində saat 15:00 radələrində tibb müəssisəsinin Uşaq Xəstəxanasına hospitalizasiya olunan 2024-cü il təvəllüdlü azyaşlının (qadın cinsli) aparılan reanimasiya tədbirlərinə baxmayaraq, 4 aprel 2026-cı il tarixində saat 05:10 radələrində bioloji ölüm faktı qeydə alınıb:

“Azyaşlı 1 aprel 2026-cı il tarixində saat 18:10 radələrində dəm qazı zəhərlənməsi səbəbi ilə reanimasiya şöbəsinə yerləşdirilmiş və yaxınlarının yazılı iltizamına əsasən, 2 aprel 2026-cı il tarixində evə buraxılmışdı. Hazırda digər 5 nəfərin müalicəsi tibb müəssisəsinin müvafiq şöbəsində davam etdirilir”.