Tanınmış balıq restoranında qətl

Səbail rayonunda iki gəncin zarafatı onlardan birinin ölümü ilə nəticələnib.

Hadisə Bibiheybət qəsəbəsində fəaliyyət göstərən tanınmış restoranlardan birində baş verib.

Baş Prokurorluğun Mətbuat Xidmətindən verilən məlumata görə, ilkin araşdırma zamanı 21 yaşlı Rüfət Əkbərlinin iş yoldaşı Azər Ömərovu itələyərək yıxması, nəticədə sonuncunun almış olduğu xəsarətlərdən ölməsinə əsaslı şübhələr müəyyən edilib. Rüfət Əkbərli polis əməkdaşları tərəfindən saxlanılıb.

Restoran əməkdaşlarının bildirdiyinə görə, tərəflər arasında hər hansı bir mübahisə baş verməyib. Ölüm hadisəsinin təfərrüatı barədə dəqiq məlumat verən olmasa da, Məhkəmə Tibbi-Ekspertizası, yəqin ki, qaranlıq məqamları üzə çıxaracaq.

Qeyd edək ki, mərhumun meyiti ekspertiza üçün Patoloji Anatomiya Birliyinin Səbail rayon şöbəsinə təhvil verilib. Faktla bağlı Səbail Rayon Prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə cinayət işi başlanaraq istintaq aparılır.