Tovuzda erkən nikahın qarşısı alındı | 14 yaşlı qız danışdı - Baku TV

Tovuzun Yuxarı Öysüzlü kəndində erkən nikahın qarşısı alınıb.

14 yaşlı qızla 33 yaşlı oğlanın toy mərasimi yarımçıq qalıb.

Daxili İşlər Nazirliyinin məlumatına görə, polis əməkdaşları toy mərasiminin keçirilməsinin qarşısını alıblar. Tərəflərin valideynləri ərazi üzrə polis orqanına dəvət olunub və onlarla profilaktik söhbətlər aparılıb. Qanunvericiliyin tələbləri izah edilib, inzibati protokol tərtib olunub və məsələyə məhkəmədə baxılacaq.

Məhkəmənin qərarına əsasən, valideynlərdən biri 1 ay müddətinə inzibati qaydada həbs edilib.

Qeyd edək ki, həbs edilən şəxs bəyin, yəni Firdovsi Abbasovun atası, rayonun Çeşməli kənd sakini Füzuli Abbasovdur.

Qazax-Tovuz Regional Təhsil İdarəsi də məsələ ilə bağlı açıqlama verib. Qurumdan bildirilib ki, 2011-ci il təvəllüdlü, Tovuz rayon sakini olan qız Mahir Ələkbərov adına tam orta ümumtəhsil məktəbində təhsil aldığı dövrdə dərslərdən mütəmadi olaraq yayınıb. Bununla bağlı məktəb rəhbərliyi tərəfindən 2023-cü ilin yanvarın 23-də hüquq-mühafizə orqanlarına rəsmi müraciət edilib.

Hüquq-mühafizə orqanlarından təhsil müəssisəsinə 2023-cü ilin fevralın 13-də daxil olan cavab məktubunda qeyd olunub ki, şagird ailəsi ilə birlikdə əvvəlki ünvanda yaşamır və onların paytaxtın Qaradağ rayonu Buta qəsəbəsində məskunlaşdıqları müəyyən edilib.

Qeyd olunan tarixdən sonra isə şagirdin ailəsinin yeni ünvan üzrə hər hansı ümumtəhsil müəssisəsinə və ya müvafiq təhsil idarəsinə rəsmi müraciətinin olmadığı müəyyən edilib. Bu səbəbdən şagirdin təhsilini davam etdirməsinə nəzarəti təmin etmək mümkün olmayıb.