Toylarda verilən yeməklər barədə şok detal | AQTA hərəkətə keçdi

İmişlidə toy məclisində kütləvi zəhərlənmə baş verib. Hadisə Muradxanlı kəndində, fərdi yaşayış evinin həyətində keçirilən mərasimdə olub.

Qida Təhlükəsizliyi Agentliyinin mütəxəssisləri tərəfindən müvafiq qurumların əməkdaşları ilə birgə araşdırmalara başlanılıb. Hadisə yerinə baxış keçirilib, müvafiq işlər görülüb. Hazırda faktla bağlı araşdırmalar davam etdirilir.

Azad İstehlakçılar Birliyinin sədri Eyyub Hüseynovun sözlərinə görə, toy mərasimlərində zəhərlənmələrin əsas səbəblərindən biri qidaların saxlanma qaydalarına düzgün əməl olunmamasıdır.

Onun sözlərinə görə, xüsusilə ev şəraitində hazırlanan turşular, eləcə də mayonez kimi qidaların saxlanma müddətinə riayət edilməməsi riskləri artırır: “Toyxanalarda verilən bəzi qidaların 4-5 saat yararlılıq müddəti var. Amma məclislərdə həmin qidaların saatlarla masada qaldığını görürük”.

Restoran inzibatçısı Rəşad Abdullayev qeyd edib ki, zəhərlənmələr əsasən köhnə məhsullardan istifadə və ərzaqların paslı qablarda saxlanması səbəbindən baş verir.

Hüquqşünas Vüsal Cəfərov isə bildirib ki, keyfiyyətsiz məhsulların istehsalı və satışı Cinayət Məcəlləsinin 200.3-cü maddəsinə əsasən cinayət məsuliyyəti yaradır. Bu halda 10 min manatdan 15 min manata qədər cərimə, iki ilədək müddətə azadlığın məhdudlaşdırılması və ya iki ilədək müddətə azadlıqdan məhrumetmə cəzası nəzərdə tutulur.