Ucarda amansız qətlin təfərrüatı məlum oldu

Ucarda ailə faciəsi yaşanıb.

İyunun 3-də saat 17:30 radələrində rayonun Rəstəcə kəndində 28 yaşlı Əliyeva Könül Nəsirəddin qızının kəsici-deşici alətlə öldürülməsi, 27 yaşlı İlyaszadə Rüfət Əlimusa oğuluna isə xəsarətlər yetirilməsi barədə Ucar Rayon Polis Şöbəsinə və Rayon Prokurorluğuna məlumat daxil olub. Müəyyən edilib ki, qanlı hadisəni qadının həyat yoldaşı 34 yaşlı Əliyev Anar Məhəbbət oğlu törədib.

Aparılmış araşdırmalarla Anar Əliyevin şəxsi münasibətlər zəminində aralarında yaranmış mübahisə zamanı rayon ərazisində yerləşən avtomobil yuma məntəqələrinin birində Rüfət İlyaszadəyə xəsarət yetirməsi, daha sonra yaşadığı evə gələrək həyat yoldaşı Könül Əliyevaya kəsici-deşici alətlə xəsarətlər yetirərək qəsdən öldürməsinə əsaslı şübhələr müəyyən edilib.

Faktla bağlı Ucar Rayon Prokurorluğunda Cinayət Məcəlləsinin 120.1-ci maddəsi ilə (qəsdən adam öldürmə) cinayət işi başlanıb. Anar Əliyev prokurorun qərarı əsasında şübhəli şəxs qismində tutularaq istintaqa cəlb edilib. Hazırda Ucar Rayon Prokurorluğunda fakt üzrə ibtidai istintaq davam edir.