Ucarda iki mikroavtobus toqquşdu

Ucarda iki mikroavtobusun toqquşması iki nəfərin xəsarət alması ilə nəticələnib.

Hadisə aprelin 25-də Bakı-Qazax magistral yolunun rayonun Alpı kəndindən keçən hissəsində qeydə alınıb.

Bakı-Tovuz marşrutu ilə sərnişin daşıyan Tovuz rayon sakini 53 yaşlı Nizami Abduləzim oğlu Məmmədov idarə etdiyi “Mercedes” markalı avtobusu sərnişin götürmək məqsədilə yol kənarında saxlayıb. Bu zaman Mingəçevir şəhər sakini 37 yaşlı Cəmil Bayram oğlu Məmmədovun idarə etdiyi eyni markalı avtobus Nizami Məmmədovun idarə etdiyi avtomobilə çırpılıb.

Nəticədə Yevlax rayon sakini 43 yaşlı Rəşad Həmid oğlu Həmidov və Mingəçevir şəhər sakini 58 yaşlı Ramiz Şakir oğlu Mollakişiyev müxtəlif xəsarətlər alıblar. Yaralılar dərhal təcili tibbi yardım maşını ilə Ucar Rayon Mərkəzi Xəstəxanasına aparılıb.

Hazırda faktla bağlı Baş Dövlət Yol Polis İdarəsinin İstintaq və Təhqiqat Şöbəsində araşdırma aparılır.