Xəstəxana və atanın açıqlaması üst-üstə düşmədi | Qızılca, yoxsa...?

Lənkəranın Viravul kənd sakini, 6 yaşlı Xədicə Qurbanlı dünyasını dəyişib.

Uşaq Mərkəzi Rayon Xəstəxanasına çatdırılsa da, onun həyatını xilas etmək mümkün olmayıb.

Xəstəxanadan bildirilib ki, Lənkəran rayon Viravul kənd sakini Qurbanlı Xədicə Babək qızı axşam saatlarında kəskin tənəffüz çatışmazlığı, dəqiqləşdirilməmiş qıcolma tutmaları diaqnozu ilə təcili yardım şöbəsinə daxil olub:

“Xəstənin vəziyyətinə uyğun olaraq dərhal Reanimasiya şöbəsinə yerləşdirilib. Bütün reanimasyon tədbirlərə baxmayaraq, xəstənin həyatını xilas etmək mümkün olmayıb. Qeyd edək ki, xəstədə anadangəlmə kvadroplegiya, spastik tetraplegiya diaqnozları olub”.

Uşağın atası Babək Qurbanlı isə bildirib ki, 2-3 gün əvvəl qızında yüksək hərarət yaranıb və bədənində qırmızı səpkilər əmələ gəlib. Uşağı xəstəxanaya aparıb. İlkin olaraq qızılca əlamətlərinin olduğunu bildiriblər və dərman yazıb, həkim nəzarətində olmaqla ambulator müalicə üçün evə göndəriblər.

Müalicə nəticəsində bədəndə olan səpkilər çəkilsə də, hərarət aşağı düşməyib və uşağı yenidən xəstəxanaya aparıblar. Sonra məlumat verilib ki, uşaq ölüb. Faktla bağlı araşdırma aparılır.