Xətai rayonunda ailə faciəsi | Məhkəmə hakiminin oğlu yoldaşını bıçaqladı - Baku TV

Paytaxtın Xətai rayonunda ailə faciəsi baş verib.

Məlumata görə, 34 yaşlı Emil Əliyev ailə münaqişəsi zəminində həyat yoldaşına çoxsaylı bıçaq xəsarətləri yetirib. Daha sonra atasının yaşadığı binaya gələrək 16-cı mərtəbəyə qalxıb və oradan yerə düşüb.

Hadisə ilə əlaqədar polis və təcili tibbi yardım briqadasının əməkdaşları ünvana gəlib. Çoxsaylı bıçaq xəsarətləri alan 27 yaşlı Şəfiqə Ələkbərova Kliniki Tibbi Mərkəzə çatdırılıb.

TƏBİB-dən verilən məlumata görə, Şəfiqə Ələkbərovaya bədənin müxtəlif nahiyələrinin çoxsaylı kəsilmiş yaraları diaqnozu təyin edilib. Qadının Reanimasiya şöbəsində müalicəsi davam etdirilir, vəziyyəti ağır olaraq qiymətləndirilir.

Baş Prokurorluğun mətbuat xidmətindən bildirilib ki, Xətai Rayon Prokurorluğunda Cinayət Məcəlləsinin 29, 120.1 (qəsdən adam öldürməyə cəhd) və 125-ci (özünü öldürmə həddinə çatdırma) maddələri ilə cinayət işi başlanaraq istintaq aparılır.

Qeyd edək ki, mətbuatda yer alan xəbərlərə görə, Emil Əliyev Qəbələ Rayon Məhkəməsinin sədri Abbas Əliyevin oğludur.