Xırdalanda müəmmalı hadisənin şahidləri danışdı

Xırdalanda özünə qəsd halları artmaqda davam edir. Belə ki, son 15 gündə 3 belə hadisə baş verib.

İntihar hadisələrindən biri avqustun 31-də M.Ə.Rəsulzadə küçəsində yerləşən binada baş verib. 8-ci sinif şagirdi binanın 13-cü mərtəbəsindən özünü ataraq həyatına son qoyub.

Hadisə şahidinin sözlərinə görə, intihar edən qız həmin binanın sakini olmayıb.

Xıradalanda yerləşən digər binada isə 2 yeniyetmə qız həyatına son qoyub. Onlardan biri 16 yaşlı Şəms Müzəffərzadə, digəri isə 15 yaşlı Şəbnəm Omiddir. Qızlardan biri binanın 4-cü, o biri isə 10-cu mərtəbəsindən özünü atıb.

Bina komendantının sözlərinə görə, yeniyetmələrdən biri həmin binada yaşayıb, digəri isə Qobu sakini olub. O qeyd edib ki, 41 saylı binaya giriş kartladır: "Hər iki qız kart olmadığı üçün binaya piyada qalxıb. Videogörüntülərdən məlum olur ki, onların yanlarında heç kim olmayıb, binaya tək qalxıblar”.

Sakinlər isə binada kart sisteminin olmadığını deyiblər: “Hamı binaya daxil ola bilir. Qapı da bağlanmır, daim açıq olur. Lift isə 2-3 gündür ki, kartla işləyir”.

Qeyd edək ki, Xırdalanda 15 gün ərzində baş verən 3 özünə qəsd halı ilə bağlı Abşeron Rayon Prokurorluğunda araşdırma aparılır. Hazırda iş üzrə zəruri ibtidai istintaq hərəkətləri davam etdirilir. İstintaqın gedişindən asılı olaraq əmələ hüquqi qiymət veriləcək.