Xırdalanda sərnişinlərin həyatını təhlükəyə atan sürücülər cəzalandırıldı | Qurumlardan açıqlama

Xırdalanda sərnişin avtobuslarının sürücüləri qaydaları kobud şəkildə pozublar.

İşıqforun qırmızı işığında keçən sürücülər yolun ortasında yarışaraq təhlükəli manevrlər ediblər.

Azərbaycan Yerüstü Nəqliyyat Agentliyindən bildirilib ki, “Sahil” MMC-nin müvəqqəti istismarında olan 517 nömrəli avtobusun və “F.Rövşən” İstehsalat Müəssisəsinin müvəqqəti istismarında olan 515 nömrəli avtobusun sürücüləri sərnişindaşıma və təhlükəsizlik qaydalarını kobudcasına pozublar.

Bununla bağlı hər iki daşıyıcı AYNA-ya dəvət olunub. Onlara sürücülər barədə ciddi ölçü götürmək tapşırığı verilib. Məsələ ilə bağlı daşıyıcı tərəfindən müvafiq tədbir görüləcək.

Daşıyıcı şirkətin rəhbərinin sözlərinə görə, avtobusun sürücüsü tərəfindən yol verilən nöqsana görə işçiyə töhmət verilib və 5 gün müddətinə işdən azad edilib: “Sürücünün yol verdiyi nöqsan zamanı avtobusda heç bir sərnişin olmayıb”.

Digər daşıyıcı şirkətdən isə bildirilib ki, həmin sürücüyə şiddətli töhmət verilib.

Baş Dövlət Yol Polisi İdarəsinin inspektoru, polis leytenantı Elvin Hacıyevin sözlərinə görə, həmin şəxslər barəsində müvafiq tədbirlər görülüb.