Yevlaxda iki gəncin mübahisəsi qətllə bitdi

Yevlaxda 20 yaşlı şəxs özündən 4 yaş böyük olan həmyerlisini qətlə yetirib.

Dəhşətli hadisə şadlıq saraylarından birində keçirilən toy məclisində baş verib.

Qohumlarının toyuna gedən 24 yaşlı Elmir Abışov məclisdə 20 yaşlı Tahir Abdullayevlə mübahisə edib. Tərəflər arasında mübahisə qanlı sonluqla bitib. Tahir Elmirə kəsici-deşici alətlə ağır xəsarət yetirib. Elmir Abışov xəstəxanaya aparılarkən dünyasını dəyişib.

Qətlə yetirilən 24 yaşlı şəxs ailəli olub və onun iki azyaşlı övladı var.

Baş verən hadisə ilə bağlı Rayon Prokurorluğu məlumat yayıb. Bildirilib ki, iyunun 10-da saat 18:00 radələrində Yevlax rayonu ərazisində 2000-ci il təvəllüdlü Abışov Elmir Habil oğlunun öldürülməsi barədə Rayon Prokurorluğuna məlumat daxil olub.

Araşdırmalarla 2004-cü il təvəllüdlü Abdullayev Tahir Ceyhun oğlunun aralarında yaranmış mübahisə zəminində Elmir Abışova kəsici-deşici alətlə xəsarət yetirərək onu qəsdən öldürməsinə əsaslı şübhələr müəyyən edilib.

Faktla bağlı Cinayət Məcəlləsinin qəsdən adam öldürmə maddəsi ilə cinayət işi başlanılıb. Tahir Abdullayev şübhəli şəxs qismində tutulub.