Yevlaxda müəmmalı cinayət: qətlə yetirilən "Azəri canavar" ləqəbli tiktokerin anası danışdı

Yevlaxda 32 yaşlı kişi güllələnib. Hadisə şəhərin Qamboy Quliyev küçəsində baş verib.

Belə ki, 1991-ci il təvəllüdlü Əhməd Əhəd oğlu Nəsibov küçədə başından güllələnərək qətlə yetirilib.

Mərhumun anası Simuzər Nəsibova bildirib ki, oğlunu bir gün öncə tanımadıqları şəxs evdən bayıra çağırmışdı:

“Mən həmin vaxt oğlumun arxasınca çıxdım. Həmin adam məni görüb çıxıb getdi. Bu gün də oğlum çörək almaq üçün marketə getmişdi, sonra eşitdim ki, oğlumu güllələyiblər”.

Hadisə ilə bağlı Yevlax Rayon Prokurorluğu da məlumat yayıb. Aparılmış araşdırmalarla 1989-cu il təvəllüdlü Saleh Əliyevin Yevlax şəhəri ərazisində aralarında yaranmış mübahisə zamanı odlu silahdan atəş açmaqla Əhməd Nəsibovu qəsdən öldürməsinə əsaslı şübhələr müəyyən edilib.

Faktla görə Yevlax Rayon Prokurorluğunda Cinayət Məcəlləsinin 120.1 (qəsdən adam öldürmə) və 228.1-ci (qanunsuz olaraq odlu silah əldə etmə və gəzdirmə) maddələri ilə cinayət işi başlanılıb. Saleh Əliyev iş üzrə şübhəli şəxs qismində saxlanılıb.