Ağır atletika üzrə Avropa birinciliyində növbəti uğurumuz

Rumıniyada keçirilən ağır atletika üzrə Avropa birinciliyində təmsilçimiz Əli Şükürlü uğurlu çıxışı ilə diqqət çəkib.

109 kq çəki dərəcəsində yarışan Əli 1 qızıl və 2 gümüş medal qazanıb.

Yaşı 20-yə qədər olan atletlər arasında qüvvəsini sınayan idmançımız təkanla qaldırmada 195 kq-ı ram edərək bu hərəkətdə fəxri kürsünün ən yüksək pilləsinə qalxıb. Birdən qaldırmada 160 kq-lıq göstərici ilə 2-ci yeri tutan Əli ümumən iki hərəkətin cəmində 355 kq nəticə ilə gümüş medala yiyələnib.

Xatırladaq ki, Buxarestdə təşkil olunan turnirdə daha əvvəl nümayəndələrimizdən Ömər Cavadov və Füqan Əliyev də uğurlu çıxışları ilə yadda qalıblar. 73 kq-da mübarizə aparan Ömər birdən qaldırmada bütün rəqiblərini qabaqlayaraq 1-ci olub. 81 kq-da yer alan Füqan isə təkanla qaldırma hərəkətində gümüş mükafata yiyələnib.

Qeyd edək ki, avqustun 3-dək davam edəcək Avropa birinciliyində 34 ölkədən 394 ağırlıqqaldıran iştirak edir.