AVRO-2024-də ilk turun oyunları davam edir

Bu gün AVRO-2024-də D və E qruplarının görüşləri keçiriləcək.

Əvvəlcə Bakı vaxtı ilə saat 17-də Rumıniya və Ukrayna yığmaları üz-üzə gələcək. E qrupunun qarşılaşmasını Qlenn Nüberqin başçılıq etdiyi isveçli hakimlər briqadası idarə edəcək.

Saat 20-də isə bu qrupun digər oyunu başlayacaq. Frankfurt şəhərində təşkil olunacaq matçda Belçika və Slovakiya futbolçuları münasibətlərə aydınlıq gətirəcək. Bu görüşdə ədaləti Halil Umut Melerin rəhbərlik etdiyi türkiyəli hakimlər briqadası qoruyacaq.

AVRO-2024-ün növbəti yarış gününə D qrupunun matçı ilə yekun vurulacaq. Düsseldorf şəhərindəki “Merkur Şpil Arena”da yarışın əsas favoriti hesab olunan Fransa millisi Avstriya seçməsi ilə qarşılaşacaq. Start fiti Bakı vaxtı ilə saat 23-də veriləcək bu oyunu ispaniyalı referi Xesus Xil Mansano idarə edəcək.

Xatırladaq ki, iyunun 14-də başlayan Avropa çempionatı iyulun 14-dək davam edəcək. Yarışın final qarşılaşması Berlinin “Olimpiyaştadion” arenasında keçiriləcək.