Avropa çempionatında mübarizə davam edir

Bu gün Almaniyada keçirilən AVRO-2024-ün qrup mərhələsində II tura yekun vurulacaq.

Günün ilk qarşılaşmasında Bakı vaxtı ilə saat 17:00-da F qrupunun komandaları – Gürcüstan və Çexiya milliləri üz-üzə gələcək. Hamburq şəhərində keçiriləcək oyunun hakimi almaniyalı Daniel Zibert olacaq.

F qrupunun digər matçında Türkiyə yığması turnirin favoritlərindən Portuqaliya kollektivi ilə qarşılaşacaq. Dortmunddakı “Siqnal İduna Park” arenasında təşkil olunacaq matçın start fiti saat 20:00-da veriləcək. Görüşdə ədalət prinsiplərini Feliks Tsvayerin başçılıq etdiyi almaniyalı hakimlər briqadası qoruyacaq.

Günün son matçında isə E qrupunda qərarlaşan Belçika və Rumıniya seçmələri münasibətlərə aydınlıq gətirəcəklər. Köln şəhərində baş tutacaq görüş saat 23:00-da başlayacaq. Qarşılaşmanın baş hakimi isə polşalı Şimon Marçinyak olacaq.