Avropanın aparıcı çempionatlarında maraqlı oyunlar keçirilib

UEFA Avropa liqasında “Qarabağ”a qalib gələn “Tottenhem” Premyer liqanın 7-ci turunda gözlənilməz məğlubiyyətlə üzləşib.

“Brayton”un qonağı olan “mahmızlar” ilk hissəni Brennan Conson və Ceyms Meddisonun topları sayəsində 2-0 hesabı ilə irəlidə tamamlayıb. Lakin “qağayılar” 2-ci yarıda 3 qol vuraraq dönüş ediblər. Qarşılaşma Braytonun 3-2 hesablı qələbəsi ilə bitib.

“Stemford Bric” arenasında “Nottingem Forest”i qəbul edən “Çelsi” də azarkeşlərini məyus edib. 2-ci hissənin əvvəlində Kris Vudun qolundan sonra Noni Madueke tarazlığı bərpa etsə də, “zadəganlar”ın bundan artığına gücü çatmayıb. “Çelsi” – “Nottingem Forest”: 1-1.

“Mançester Yunayted” də turu xal itkisi ilə başa vurub. “Aston Villa” ilə qarşılaşan mankunianlar birmingemlilərlə qolsuz sülh bağlayıb.

İspaniya çempionatının lideri “Barselona” növbəti inamlı qələbəsini qazanıb. Səfərdə “Alaves”lə üz-üzə gələn “blauqrana” 3 xalı Levandovskinin het-triki sayəsində aktivinə yazıb.

Almaniya çempionatına başçılıq edən “Bavariya” da hesabat turunda rəqibin qapısından 3 top keçirsə də, üstünlüyünü qoruya bilməyib. Frankfurtda yerli “Ayntraxt”la üz-üzə gələn “rekordmayster” əsas vaxtın sonlarında buraxdığı topa görə 1 xala razılaşmalı olub.