Eduard Məmmədov Bakıda keçiriləcək Avropa çempionatından danışdı

“2027-ci ildə Azərbaycanda WAKO versiyası üzrə Avropa çempionatı keçiriləcək. Doğma vətəndə yarışların təşkil olunması kikboksinqin inkişafı deməkdir”.

Bunu Baku TV-yə açıqlamasında Azərbaycan Kikboksinq Federasiyasının (AKF) vitse-prezidenti Eduard Məmmədov bildirib.

O, vitse-prezident vəzifəsini layiqincə yerinə yetirməyə çalışacağını qeyd edib:

“Gənc idmançılara düzgün istiqamət verəcəyəm ki, böyük turnirlərdə uğurlar əldə edə bilsinlər. Hər zaman onlara dəstək olacağam”.

E.Məmmədov 2027-ci ildə Azərbaycanda keçiriləcək WAKO versiyası üzrə Avropa çempionatında 50-dən çox ölkənin iştirakının planlaşdırıldığını söyləyib:

“Bildiyiniz kimi, bu turnir iki ildən bir keçirilir. Çox vaxt avqust və sentyabr aylarında təşkil olunur. Çalışacağıq ki, gənclərimiz bu turnirdə yaxşı nəticələrə nail olsunlar. Əsas odur ki, üçrəngli bayrağımızı ucaldıb, himnimizi səsləndirsinlər. Uşaqlar artıq böyük yarışlar gördükdən sonra həvəslənirlər. Düşünürəm ki, Avropa çempionatı ilə Azərbaycanda kikboksinqə maraq daha da artacaq”.