Erməni rəqib idmançımıza məğlubiyyətlə barışmadı

Gürcüstanda təşkil olunan "Batumi Open" beynəlxalq karate yarışında erməni təxribatı baş verib.

Belə ki, Dünya Şotokan Karate Federasiyasının prezidenti Hitoşi Kasuya Senseyin də izlədiyi final görüşündə azərbaycanlı idmançı Alika Semixova ilə üz-üzə gələn Ermənistan nümayəndəsi məğlubiyyətini həzm edə bilməyib. Alikanın görüşün qalibi elan edilməsindən sonra ona yaxınlaşan rəqib idmançıya yaraşmaz hərəkət edərək, A.Semixovanın üzünə zərbə endirib.

Erməni təxribatından sonra təmkinli davranan karateçimiz onun bu hərəkətinə reaksiya verməyib. Maraqlıdır ki, idmançılarının bu tərbiyəsiz davranışına baxmayaraq, Ermənistan nümayəndələri onun hərəkətini müdafiə etməyə çalışıblar.

Qeyd edək ki, Batumi şəhərində keçirilən beynəlxalq yarışda Qazaxıstan, İran, Şotlandiya, ABŞ və Özbəkistan karateçiləri də iştirak ediblər.