Qarabağ Avropa liqasının pley-off mərhələsində

“Qarabağ” komandası tarixi nailiyyətə imza atıb.

“Köhlən atlar” Avropa liqasında pley-offa yüksələn ilk klubumuz adına yiyələnib. Azərbaycan çempionu bu uğura qrup mərhələsinin son turunda “Hekken”i məğlub etməklə nail olub.

Tofiq Bəhramov adına Respublika Stadionunda keçirilən görüşdə hesab artıq 1-ci dəqiqədə açılıb. Leandro Andrade “Qarabağ”ı irəli çıxarıb. İlk hissənin sonlarında fərq 2-yə yüksəlib. Yassin Benzia təmsilçimizin üstünlüyünü möhkəmləndirib. İlk hissə 2-0 hesabı ilə yekunlaşıb.

56-cı dəqiqədə “Qarabağ” azlıqda qalıb. Marko Veşoviç birbaşa qırmızı vərəqə ilə cəzalandırılıb. “Hekken” bundan sonra təzyiqi artırsa da, ancaq 1 qolun əvəzini çıxa bilib. Artırılan dəqiqələrdə Bədavi Hüseynov avtoqol müəllifi olub. Qarşılaşma “Qarabağ”ın 2-1 hesablı qələbəsi ilə yekunlaşıb.

Bu nəticədən sonra komandamız H qrupunda xallarının sayını 10-a çatdırıb. Qrup mərhələsini 2-ci yerdə tamamlayan “Qarabağ” ölkə futbolu tarixində Avropa liqasının pley-offuna yüksələn ilk kollektiv olub.