“Real” çempionluq yolunda ağır zərbə aldı

La liqanın son çempionu “Real Madrid” 19-cu turun matçında “Real Sosyedad”la bacarmayıb.

“Santyaqo Bernabeu” arenasında keçirilən görüş qolsuz bərabərliklə yekunlaşıb. Bu nəticədən sonra 42 xalı olan və 2-ci yerdə qərarlaşan “kral klubu” lider “Barselona”dan 5 xal geri qalır. 39 xalı olan “Real Sosyedad” isə 3-cüdür.

A Seriyasının lideri “Napoli” 20-ci turda “Roma”nı qəbul edib. Son 3 oyunda qələbə qazanan neapollular bu dəfə də azarkeşlərini sevindiriblər. Viktor Osihmen və Covanni Simeonenin toplarına “canavarlar” ancaq El Şaravinin təsəlli qolu ilə cavab veriblər. 2-1 hesabı ilə qalib gələn “Napoli” 53 xalla liderliyini davam etdirir. Komanda ən yaxın izləyicisi “İnter”i 13 xal qabaqlayır. 37 xalı olan “Roma” isə 6-cıdır.

Almaniya çempionatında 18-ci turun mərkəzi görüşü Leverkuzenin “Bay-Arena” stadionunda keçirilib. Yerli “Bayer”in qonağı olan “Borussiya Dortmund” 2-0 hesablı qələbə qazanıb. “Sarı-qaralar”ın heyətində Kərim Adeyemi fərqlənib. Daha bir top avtoqolla yadda qalan Tapsobanın passivindədir. Qalibiyyətdən sonra 34 xalı olan “Borussiya” lider “Bavariya” ilə xal fərqini 3-ə endirib. Dortmund klubu hazırda 4-cü yerdədir. Ardıcıl 5 qələbədən sonra uduzan “Bayer” isə 9-cudur.