Slovakiya - Ukrayna matçında qapılara 3 qol vurulub

Futbol üzrə Avropa çempionatının II turunda daha 1 görüş baş tutub.

Düsseldorfda keçirilən qarşılaşmada Slovakiya və Ukrayna milliləri üz-üzə gəliblər. Maykl Oliverin idarə etdiyi oyunda hesab 17-ci dəqiqədə açılıb. İvan Şranç ukraynalıların qapısına yol tapmağı bacarıb. Slovakiya seçməsi fasiləyə minimal üstünlüklə yollanıb.

Lakin ikinci yarıda hücumlarını sürətləndirən Ukrayna millisi tarazlığı bərpa edib. 54-cü dəqiqədə Nikolay Şaparenko hədəfi dəqiq nişan alıb. Oyunda son nöqtəni isə 80-ci dəqiqədə Roman Yaremçuk qoyub. Slovakiya – Ukrayna: 1-2.

Qeyd edək ki, Slovakiya yığması növbəti turda Rumıniya ilə qarşılaşacaq. Ukrayna isə Belçika ilə üz-üzə gələcək.